مشهد تمثيلي:
سالم العباب :مقهى شعبي، كراسي وامياز تتعالى الأصوات وتتداخل بين الزبائن وعامل المقهى. زبون1: واحد شاهي ياوليد زائد سكرزبون2:ثلاثة شاهي وواحد نصعامل المقهى: وعندك واحد زائد سكر وثلاثة دبل وواحد نص زائد اللبن يا مقهوي يصل ثلاثة من أصدقاهم : احمد في الأربعين.. قاسم في الخمسين.. أمين شاب يجلسون حول طاولة عليها بقايا شاهي والذباب متكاثر عليها. أمين: تعال ياوليد امسح الميز وهات ثلاثة شاهي. العامل: حاضر (يمسح الطاولة ويدير راسة ناحية المقهوي) وعندك ثلاثة شاهي مع الحوائج.. “يغادر”. احمد: يا اخي طفي السيجارة ياقاسم، خاف الله حبة بعد حبة، صحتك ياأخي!؟ قاسم: “ يسعل” اح،اح مكبود يا أخواني من هذا المراقب اللي ضيع جهدي وجهد ابني فطيس.. بالله عليكم ايش تسموا هذا !!؟ امين : ياعم قاسم ليش زعلان على ابنك وحنقان من هذا المراقب التربوي. وهده نجح لك ابنك في الامتحان بدون جهد ولا تعب .العامل: “ ينزل الشاي” .. وهذي ثلاثة شاهي. احمد: اصلاً عمك قاسم يا احمد يشتي ابنه يفتحس ويعتمد على المراجعة والاستيعاب وهذا المراقب جابوه يكحلها عور عينها. أمين: دحين انتوا باتركبوا لي من الحبة قبة كما يقولوا ولا كيف!؟قاسم:يا ابني بشرع من ذا لمن يطلعوا عيالنا أميين ويعود وهم على الفش مش قده كفا يتهم المنهج اللي ماهلوش والمدرسين اللي اغلبهم طول العام غياب واعذار وعادهم يوصوا مراقب الامتحانات واول مايدخل الصف يقول لهم.. انا با اجلس عند الباب وانشوا يا طلبه غشوا لكن بسرعة أشتي اخلص وأروح لي هذا ايش تسميهوه يا احمد بالله عليك!!؟ أمين: حوشنا بكم من صدق إذا وصواً مراقب صارم وزرزر الامتحان قلتوا فشلوا عيالنا وإذا جابوا واحد متسامح قلتوا علموا عيالنا الغش انتوا حوشة من صدق وارسوا لكم على بر. احمد: تدري انه المدرس قدوة ومثل أعلى وعندما يتعلم منه التلميذ الغش والخداع تعرف انه بايطلع غشاش ومخادع في حياته يا أمين؟قاسم: هيا تصوروا ان ابني روح فرحان ويضحك وعندما سألته كيف كان الامتحان.. رد وقال والله يا ابه لو ادري انه بايقع كذا ماتعبت نفسي بالمراجعة. قلت له ايش تقصد قال المراقب خلانا نغش ونجوب من الكتب تصورو!!امين: انا اشوف انه هذا المدرس يستحق الشكر لأنه ساعد الطلبة لانه يعرف انه المنهج من حق ام الجن والأسئلة تنزل من صنعاء مخيطة بصميل واغلبها ما هليش وأجوبته بالمنهج المراقب يعرف ايش معه بالتربية لهذا أسهلها على الطلبة يا جماعة.قاسم: يالله يا الله اشربوا الشاي وخلوا نحنا نروح ياجماعه ومافيش فائدة بعد ماوقع الفاس بالراس.احمد: هيا عجبك يا امين زعلت علينا عمك قاسم!؟امين: انا والله ما ادافع عن التربية والتعليم ولكن انا اشرح لعمي قاسم الواقع اللي نعيشه ونلمسه.قاسم: بس قوم يافيلسوف قال يشرح.. انتوا اصلاً جيل فاشل وشبه امي لأنكم راضي و بالواقع اللي نعيشة والجيل اللي بايجي بعدكم بايجي أعمى للآخر، امي والسبب الواقع اللي تقوله يافصيح ..ينهض الجميع.